أساسيات الدورة الشهرية
الدورة الشهرية من اسمها عبارة عن دايرة، بتبدأ وتنتهي في نفس المرحلة، وكأنها رحلة بتعيد نفسها كل شهر. لكن في وسط الرحلة دي بيكون في تغيرات في جسمنا و اعراض بنحس بيها، تعالي نتعرف علي ما وراء الرحلة ديه.
الدورة عبارة عن سلسلة من التغيرات الطبيعية اللي بتحصل، الهدف الأساسي منها هو تحضير للحمل، لو مفيش حمل، الجسم بيرجع يعيد ضبط نفسه و يبدأ من جديد.
الدورة الشهرية بتنقسم لدورتين رئيسيتين متزامنين متصلين ببعض ببتحكم بيهم الهرمونات: دورة المبيض اللي بتحضر البويضة، ودورة الرحم اللي بتجهز المكان لاستقبال جنين.
عادةً الدورة الشهرية بتستمر حوالي ٢٨ يوم، لكنها ممكن تكون أقصر (٢١ يوم) أو أطول (لحد ٣٣ يوم). الأيام دي بتتقسم على مراحل مختلفة، وكل مرحلة ليها دور تلعبه عشان تهيئ الجسم.
١. مرحلة التجهيز (من اليوم ١ الى يوم التبويض)
المرحلة دي بتبدأ مع أول يوم في الدورة الشهرية، لما مستوى هرمون الإستروجين بيكون منخفض. أول أيام الدورة الشهرية هي بداية مرحلة التجهيز واللي بتكون فيها بطانة الرحم بتنزل كدم الحيض عشان محصلش تخصيب للبويضة في الدورة الي فاتت.
في المرحلة دي، المبيض بيبدأ في إفراز هرمونات زي الإستروجين اللي بتحفز نمو الجريبات (اللي بتحتوي على البويضات). الجريب الأكثر نموًا هو اللي بيحتوي على البويضة اللي هتخرج في مرحلة التبويض.
٢.التبويض: اليوم ال١٤ قبل بداية الدورة الشهرية الجديدة
حوالي ١٤ قبل بداية الدورة الشهرية الجديدة، بيحصل ارتفاع مفاجئ في هرمون الـ LH (الهرمون المنشط للجسم الأصفر)، وده اللي بيسبب في خروج البويضة الناضجة من أحد الجريبات، و ده اللي بنسميه التبويض. ممكن يخرج اكتر من بويضة واحدة لما أكتر من جريب في المبيض يوصل للنضج في نفس الوقت، ده بنسميه التبويض المتعدد و لو تم تخصيب البويضات دي، ممكن ينتج عن ده توائم غير متطابقة (توائم ثنائية).
التبويض المتعدد بيكون أكتر لو في تاريخ عائلي للتوأم أو في سن الأربعين بسبب تغييرات في استجابة المبيض للهرمونات او لو حد بياخد أدوية تحفيز التبويض. ممكن تعرفي اكتر عن مرحلة دي في المقال ده.
٣.المرحلة اللوتينية: (من يوم التبويض إلى بداية الدورة الجديدة)
بعد التبويض، الجريب الفارغ بيتحول إلى الجسم الأصفر، واللي بيبدأ يفرز هرمون البروجستيرون. البروجستيرون بيجهز بطانة الرحم (الغشاء المبطن للرحم) لبيئة غنية بالأوعية الدموية والمغذيات، وده علشان تكون جاهزة لدعم البويضة لو تم تخصيبها. لو محصلش تخصيب الجسم الأصفر بيتلاشى بعد حوالي ١٠-١٤ يوم (عمره الافتراضي)، وده بيخلي مستويات البروجستيرون والاستروجين تقل بشكل كبير.
بسبب ارتفاع وانخفاض الهرمونات، بعض الستات و البنات بيحسوا بأعراض مختلفة زي:
- تقلبات مزاجية.
- إحساس بالانتفاخ أو احتباس السوائل.
- آلام أو حساسية في الثدي.
- صداع أو إرهاق.
- ظهور حب الشباب.
٤.الطمث (الدورة الشهرية):
انخفاض مستوى البروجستيرون بيوقع بطانة الرحم و بيخليها تتساقط وتخرج من الجسم في صورة دم الحيض .المرحلة دي بتستمر من ٣-٧ أيام عادةً و بتحدد بداية دورة جديدة.
الدورة الشهرية وخصائصها ممكن يختلفوا بشكل كبير من حد للتاني من ناحية طول الدورة، شدة الأعراض، وطبيعة النزيف اعرفي اكتر عن ايه الطبيعي و ايه لا في المقال ده.