التبويض

التبويض مرحلة أساسية في الدورة الشهرية، وهي الوقت اللي بتكون فيه البويضة جاهزة للتخصيب، وبالتالي بتزيد فرصة الحمل بشكل كبير.

كل بنت في سن البلوغ، بيكون عندها حوالي 300,000 لـ 400,000 بويضة غير ناضجة محفوظة داخل المبيض في أكياس صغيرة اسمها الحويصلات، مع كل دورة شهرية، بيتم اختيار مجموعة صغيرة من الحويصلات عشان تبدأ في النمو تحت تأثير هرموني FSH و LH، لكن في العادة بويضة واحدة بس هي اللي بتكمل نضج و يجي وقت وقت خروجها اللي بنسميه وقت التبويض.

التبويض هو العملية اللي بتخرج فيها البويضة الناضجة من المبيض و بتتحرك في قناة فالوب عشان توصل للرحم.، ولو قابلت حيوان منوي، ممكن يحصل تخصيب. التبويض بيحصل مرة واحدة كل شهر، و ممكن نعرف وقت التبويض عن طريق إننا نشوف الدورة الشهرية بتحصل كل أد إيه ونطرح من الإطار الزمني ده ١٤ يوم. (مثال: لو الدورة بتحصل كل ٢٨ يوم فده يخلينا نتوقع إن التبويض غالبا هيحصل يوم ١٤) بس دا لو دورتنا منتظمة.

البويضة تقدر تعيش (صالحة للتلقيح) لمدة ١٢-٢٤ ساعة بعد ما تتحرر من المبيض. لو حصل تلقيح، بتكون البويضة مخصبة و بتتحرك ناحية الرحم عشان تنغرس وتتحول لجنين. أما لو مفيش تلقيح، فالجسم بيتخلص منها مع بطانة الرحم أثناء الدورة الشهرية.

التبويض مرتبط بحالة الجسم والصحة العامة، فيه عوامل كتير ممكن تأثر على التبويض:

• التوتر: التوتر الزائد ممكن يلخبط الهرمونات ويأخر التبويض أو يمنعه تمامًا.
• النظام الغذائي: سوء التغذية، النحافة الشديدة، أو السمنة ممكن يسببوا اضطرابات في التبويض ويأثروا على انتظام الدورة الشهرية.
• الاضطرابات الهرمونية: مشاكل زي تكيس المبايض أو اضطرابات الغدة الدرقية، أو زيادة في هرمون اللبن ممكن تعطل التبويض أو تخليه غير منتظم.
• العمر: التبويض بيقل مع تقدم العمر، لأن عدد البويضات بيقل، وده من الاسباب اللي ممكن تقلل فرص الحمل بعد سن ٣٥. (لكن مش مستحيل)